Бұрқан бұлақ сарқырамасы

Бұрқан бұлақ - Орталық Азиядағы ең биік әрі әсем сарқырамалардың бірі. Ол Жетісу Алатауындағы көркем де қуатты Қора өзенінің аңғарында орналасқан. Төрт қиядан құлай аққан сарқыраманың жалпы биіктігі - 168 метр. Ал көз жететін төменгі үш қиясы - 114 метр. Сарқырама теңіз деңгейінен 2000 метр биіктікте орналасқан.

Сарқырама орын тапқан Бұрқан бұлақ өзені Қаратаудан бастау алады. Өзеннің Қора шатқалындағы сағасы биік жартасты белбеумен ағып өтеді. Бұл белбеу өз кезегінде шатқалдың оң жақ бөктерін жиектейді. Сарқырама жартас арасында сумен қайралып қалған  тар науамен ағады. Төменгі жақта науамен аққан су ірі құз шоқысына соғылып, қуатты ағынмен табиғи су алабына құлап қосылады. Тіпті аптап ыстықтың өзінде сарқырама маңында жанға жайлы салқындық сезіледі. Баурайында жайқалған шыршалар мен азиялық аршаның хош иісі мұндағы ылғалды ауаға пайдалы қасиеттер сыйлап, сарқырама маңын табиғи шипажайға айналдырады.  Бүгінде осы кереметті аңғарған саяхатшылар саны көбейіп, Бұрқан бұлақтың танымалдылығы жыл сайын еселеп артуда.