Мәшһүр Жүсіп Көпейұлы атындағы мешіт

Мәшһүр Жүсіптің құрметіне салынған мешіт – Павлодар қаласының бас мешіті және қала орталығындағы сәулет өнерінің інжуі. Қазақтың ақыны, этнограф Мәшһүр Жүсіп Көпейұлының қазақ руханияты мен мәдениетіне қосқан үлесі орасан зор. Ел арасында Мәшһүр Жүсіп әулие ретінде дәріптеледі.

Павлодардағы осынау мешіт Қазақстандағы ең ірі діни ғимараттардың бірі болып табылады. Оның архитектуралық кескін-келбетіне қарасаңыз, заңғар мұнаралар мен шаңырақ пішіндес көгілдір күмбезді көресіз. Бұл ғимарат ислам дәстүрлері мен қазақтың ұлттық мәдениетін үйлестірген бірегей туынды. Мешіт екі қабаттан тұрады. Екінші қабатта әйелдерге арналған намаз залы, неке қию бөлмесі, дәріс бөлмелері, асхана, ал бірінші қабатта кітапхана, мұражай және бас намаз залы орналасқан. Мәшһүр Жүсіп Көпейұлы атындағы мешіт – Павлодар қаласының тұрғындары мақтан тұтар көрнекті орны, кез келген келушісін бейжай қалдырмайтын рухани орда.