Irbis Race тау ультрамарафоны

Қатысушылар 18 сағаттың ішінде  50 шақырымға созылатын күрделі жолды өтіп үлгерулері керек. Бүгінгі таңда әлемнің түрлі елдерінен шыққан 200-ден астам спортшы  өздерінің тау жарысына қатысатындықтарын растаған.  Irbis Race тау ультрамарафоны 22 тамыз күні сағат 6.00-де «Гаиш» обсерваториясы аумағында басталады деп жоспарланған. Мәре Кімасар шатқалында орналастырылады. Қатысушылар еңсеруге тиісті ең биік нүкте теңіз деңгейінен төрт мың метр биіктікте жатыр.

Әрбір қатысушы берілген қашықтықты жүгіріп өтіп қана қоймай, сонымен қатар шамнан бастап, құтқару көрпесіне дейінгі барлық қажетті жабдықты өзімен алып жүруге міндетті. Себебі бекітілген тізімде көрсетілген кез келген затты қалдырып кету немесе жоғалту дисквалификацияға әкеліп соғады. Бірақ жағымды бонустар да жоқ емес. Бастысы – жол көрсе көз тоймайтын, табиғаты көркем орындармен өтетіндігінде. Осылайша, жүгіруге жаны әуес қатысушылар денелерін шынықтырып қана қоймай, үздіксіз әсем көріністерді тамашалай алады. Оған қоса жол бойында спортшыларға арналған үш тамақтану орны ұйымдастырылған.

Өткен жылы Шыңғыс Байқашев ультрамарафонның жаңа рекордын орнатқан болатын. Ол 50 шақырымды 6 сағат 2 минутта жүгіріп өтті. Бұл – Денис Власовтың чемпиондық көрсеткішінен 9 минутқа аз нәтиже.